Заврши реконструкцијата на вториот кат од Здравствениот дом во Липково. Министерот за здравство Арбен Таравари денеска по тој повод, го посети овој здравствен дом и истакна дека целта е да се пружи ефикасна здравствена заштита на сите граѓани и посебно на жителите од руралните средини.
Министерот за здравство нагласи дека граѓаните се центар при креирањето на здравствени политики, и инвестирањето овозможува пружање ефикасна здравствена заштита во локалните заедници.
– Ме радува тоа што го видов, условите битно се подобрени посебно на вториот кат. Очекуваме во 2025 година да се инвестира и во долниот кат. Ова е најдобар пример како ние што креираме политики во здравството треба да инвестираме посебно во руралните средини, бидејќи наш фокус се граѓаните во здравствениот систем, тие се центарот на целиот систем, тоа што е најбитно за здравствениот систем. За нив, битно е да имаат брзи здравствени услуги и што поблиску до нив, изјави Таравари.
Министерот посочи дека со инвестициите во руралните средини се намалува притисокот на пациенти во поблиските градови или во главниот град, пациентите не мора да патуваат за да добијат здравствена услуга во средините каде што има кадар, како што е случај во Липково каде има и општи доктори и стоматолози.
– Меѓутоа за да ги задржиме кадрите, да останат тука, а и луѓето да веруваат за здравствениот систем и ние како Министерство за здравство треба да помогнеме овие рурални амбуланти да изгледаат, пред сè, достоинство, изјави Таравари.
Тој посочува дека е прагматичен и не може да се очекува отворање на болници во рурални средини, но кажа дека во овие средини може да се отворат поликлиники кои ќе пружат помош при итни медицински состојби. Таравари нагласува дека и во поголемите градови како што се Куманово, Тетово, Гостивар, Струмица, Струга, Прилеп има недостиг на кадар.
– Јас не сакам да бидам премногу оптимист, туку сакам да бидам прагматичен. Нам ни требаат добро организирана евентуално поликлиника отколку што ни требаа болници секаде да отварме. На крајот на краиштата Липково е многу блиску до Куманово, така што ако добро функционира поликлиника тука со неколку специјалисти, јас мислам дека е сосема доволно за давање прва помош и третман на одредени итни медицински состојби, рече министерот.
Подобрување на условите очекува и директорот на Здравствениот дом во општина Липково, Шкљќим, Муслиу кој покрива приближно 30.000 пациенти од оваа општина во североисточниот дел од државата.
Муслиу се заблагодари за поддршката за инвестициите во јавната здравствена установа. Директорот на здравствената установа информираше дека двајца специјалисти треба да се вратат во установата, а уште двајца годинава ќе одат на специјализација.